चितवन । भरतपुर महानगरपालिका ७ स्थित अंकुरम एकेडेमीमा विज्ञान प्रदर्शनी सम्पन्न भएको छ । विश्व विज्ञान दिवसको अवसरमा स्कुल परिसारमा नै आज (बिहीबार) एक दिने विज्ञान प्रदर्शनी आयोजना भएको हो । प्रदर्शनीमा स्कुलको कक्षा १ देखि १२ सम्मका विद्यार्थीले निर्माण गरेको सामाग्रीहरु प्रदर्शन गरिएको थियो ।
विद्यार्थीहरुले दैनिक जीवनमा प्रयोगमा आउने सामाग्रीहरु तयार पारेर प्रदर्शन गरेका थिए । स्कुलको साइन्स एण्ड रोबर्ट्स क्लबका विद्यार्थीहरुले इलेक्ट्रिक र रोबर्ट कारदेखि, फायर अलार्म, वाटर अलार्म, स्वचालित सवारी साधन, स्मार्टसिटीलगायत निर्माण गरी प्रदर्शन गरेको स्कुलका लेभल हेड तथा प्रदर्शनी कार्यक्रम संयोजक अर्जुन शर्माले जानकारी दिए । ती सबै सामाग्रीहरु विद्यार्थीले एक हप्तामा तयार पारेको उनले बताए ।
उनका अनुसार विद्यार्थीहरुले एक सय ८० भन्दा बढी फरक फरक प्रोजेक्ट तयार परेका थिए । स्कुलका एक हजार भन्दा बढी विद्यार्थी र अभिभावकहरुले प्रदर्शनीको अवलोकन गरेका थिए । यस्तै अन्य बिभिन्न १५ विद्यालयका एक सय ५० भन्दा बढी विद्यार्थीहरुले पनि प्रदर्शनी अवलोकन गरेका थिए ।
विद्यार्थीले विज्ञान सम्बन्धी दक्षता हासिल गर्न सक्षम बनून् भन्ने उद्धेश्यले कार्यक्रम आयोजना गरिएको उनको भनाइ छ । स्कुल हरेक वर्ष विश्व विज्ञान दिवसको अवसरमा प्रदर्शनी आयोजना गर्ने गरेको छ । यसले विद्यार्थीमा प्रयोगात्मक ज्ञान बढाउन मद्धत मिल्ने स्कुलको विश्वास छ । क्रियाकलापमा आधारित शिक्षालाई अंकुरमले जोड दिँदै आएको छ ।
