भरतपुर, १ चैत ।
अङ्कुरम् एकेडेमीमा कक्षा ९ का विद्यार्थीहरुले १४ मार्च अर्थात् अन्तर्राष्ट्रिय पाइ दिवस (International Pi-Day) उल्लासमय वातावरणमा सम्पन्न गरेका छन् ।
गणित विषय विभागको संयोजकत्वमा सम्पन्न पाइ डेमा विद्यार्थीहरुले गणित विषयसँग सम्बन्धित विभिन्न क्रियाकलापहरु गरेका थिए । सोही क्रममा कक्षा ९ की छात्रा जोएल केसीले बिहानी सभामा ‘पाइ’को महत्व बारेमा बोलेकी थिइन् ।
कलात्मक नमुना प्रस्तुत गर्दै विद्यार्थी
सबैभन्दा धेरै अंकको ‘पाइ’ सूत्र स्मरण तथा लेखन प्रतियोगितामा १३१ अंक सहित राघव अग्रवालले प्रथम स्थान हासिल गर्न सफल भए भने कृशान्त वंशल र क्यारेन पौडेल क्रमश: ११० र १०४ अंकसहित द्वितीय र तृतीय स्थान हासिल गर्न सफल भए ।
गणित विभाग प्रमुख विनोद अधिकारीको संयोजकत्वमा सम्पन्न उक्त प्रतियोगितामा विद्यालयका निर्देशक नैम चौधरीले शुभकामना मन्तव्य राखेका थिए भने विजेता विद्यार्थीहरुलाई प्राचार्य सुमन पौडेलले पुरस्कृत गरेका थिए ।
कार्यक्रममा विद्यार्थीहरूले ‘पाइ’को आकारका विभिन्न कलात्मक नमूना आकारहरु प्रदर्शन गरेका थिए ।