Hi, How Can We Help You?

Category Archives: Inter-School

भरतपुर, २९ भदौ ।
भरतपुर महानगर प्रज्ञा प्रतिष्ठानको आयोजनामा गरिएको चित्रकला प्रतियोगितामा विजयी विद्यार्थीलाई नगद पुरस्कारसहित पुरस्कृत गरिएको छ । प्रज्ञा प्रतिष्ठानले महानगरको शैक्षिक प्रशासन महाशाखाको समन्वयमा गत बुधबार भरतपुर महानगरका आधारभूत तहका विद्यार्थीहरुबीच चित्रकला प्रतियोगिता आयोजना गरेको थियो ।

बालदिवसको सन्दर्भमा आयोजना गरिएको प्रतियोगितामा अङ्कुरम् एकेडेमीकी कक्षा- ३ मा अध्ययनरत दिविजा रेग्मी प्रथम भएकी छन् । यसैगरी प्रतियोगितामा नारायणी नमूना मावि भरतपुरकी कक्षा ५ की जेनिसा सारु मगर द्वितीय, प्रज्ञा एकेडेमीकी कक्षा ५ की रोशनी बिक तृतीय र जनप्रिय पब्लिक स्कूलमा कक्षा ५ कि समृद्धि महतोले सान्त्वना स्थान हासिल गरे ।

`बालबालिकामा लगानी : सुनिश्चित भविष्यको थालनी´ भन्ने मूल नाराका साथआयोजना गरिएको विशेष समारोहमा विजयी विद्यार्थीहरूलाई भरतपुर महानगरपालिका शिक्षा शाखा प्रमुख महेन्द्रप्रसाद पौड्याल, महिला, बालबालिका तथा सामाजिक विकास महाशाखाकी निर्देशक शान्ताकुमारी पौडेल, प्रज्ञाप्रतिष्ठानका उपकुलपति इन्द्रप्रसाद रेग्मी, सदस्य सचिव बालकृष्ण थपलियाले नगद पुरस्कारसहित सम्मान गरेका थिए । प्रतियोगितामा १०६ वटा आधारभूत विद्यालयका विद्यार्थीहरुले सहभागिता जनाएका र प्रथम, द्वितीय, तृतीय र सान्त्वना स्थान हासिल गर्ने एक-एक जनालाई क्रमश: पाँच,चार,तीन,दुई हजार नगद र प्रमाणपत्रसहित सम्मान गरिएको ज्ञाप्रतिष्ठानका सदस्य सचिव थपलियाले जानकारी दिए ।

प्रतियोगिताको निर्णायकका कलाकारहरू रामहरि श्रेष्ठ, प्रकाश थापा प्रथा र दामोदर बराल रहेका थिए ।

भरतपुर, २४ भदौ ।
भरतपुर-७ कृष्णपुरस्थित अङ्कुरम् एकेडेमीले अन्तर विद्यालय स्काउट नृत्य रनिङशिल्ड प्रतियोगिता सम्पन्न गरेको छ ।
प्रतियोगितामा १९ वटा विद्यालय सहभागी थिए । प्रतियोगितालाई एकेडेमीका प्रधानाध्यापक सुमन पौडेलले अध्यक्षता गरेका थिए ।

प्रतियोगितामा भरतपुर-५ स्थित श्री भद्रकुमारी राष्ट्रिय विद्यालयले प्रथम स्थान हासिल गरेको छ । त्यसैगरी भरतपुर-१० स्थित ॐ शान्ति एकेडेमीले द्वितीय स्थान हासिल गरेको छ भने भरतपुर-७ मा रहेको वाल्मीकि शिक्षा सदन तृतीय स्थान ओगट्न सफल बन्यो ।
प्रतियोगितामा प्रथम, द्वितीय र तृतीय हुनेले क्रमशः १० हजार, ७ हजार ५ सय र ५ हजार रुपैयाँसहित प्रमाणपत्र तथा ट्रफी प्राप्त गरेका छन् । त्यसैगरी विशेष पुरस्कार अन्तर्गत उत्कृष्ट नृत्य प्रस्तोताका रूपमा सनराइज स्कुलकी पृष्टि परियार र उत्कृष्ट नृत्य प्रशिक्षणका रूपमा राष्ट्रिय मावि कृष्णपुरलाई पुरस्कृत गरिएको एकेडेमीका सह- प्राचार्य ओमराज मैनालीले बताए । प्रतियोगिताको निर्णायक मण्डलमा रोशिका राउत, निरा गुरुङ र राकेश विश्वकर्मा रहेका थिए ।
कार्यक्रमको प्रमुख अतिथिका रूपमा भरतपुर महानगरपालिका वडा नम्बर- ७ का अध्यक्ष राजेन्द्रमणि काफ्ले रहेका थिए । कार्यक्रममा बोल्दै अध्यक्ष काफ्लेले अन्तर्राष्ट्रिय मापदण्ड अनुसार सञ्चालित अङ्कुरम् एकेडेमीले अन्तर्राष्ट्रिय स्तरमै आफ्ना कार्यक्रमहरु गर्दै आइरहेको बताए । `अङ्कुरम्ले आगामी दिनमा पनि यस्तै किसिमका पृथक र रोचक कार्यक्रमहरू प्रस्तुत गर्दै जाओस्´, काफ्लेले भने ।
कार्यक्रमको विशिष्ट अतिथिमा भरतपुर महानगर स्काउटका संयोजक शिवप्रसाद बराल रहेका थिए भने अतिथिका रूपमा ईश्वर गुरुङ, टंकप्रसाद त्रिपाठी सहभागी थिए ।

सह-प्राचार्य ओमराज मैनालीले स्वागत मन्तव्य राखेको कार्यक्रमलाई अर्जुन शर्माले सहजीकरण गरेका थिए ।

भरतपुर, २६ मंसिर ।
वाल्मीकि शिक्षा सदनको व्यवस्थापन र भरतपुर इङ्लिस स्कूल्स सोसाइटी (बेस) को आयोजनामा बेस स्तरीय वादविवाद प्रतियोगिता सम्पन्न भएको छ ।
बेसका अध्यक्ष इन्द्रेश शाहको अध्यक्षता र प्याब्सन चितवनका अध्यक्ष कीर्तिनिधि अर्यालको प्रमुख अतिथ्यतामा वाल्मीकि शिक्षा सदनमा सम्पन्न उक्त कार्यक्रम अतिरिक्त क्रियाकलाप प्रमुख खेमलाल पहारीले सञ्चालन गरेका थिए ।

वाल्मीकि शिक्षा सदनका शैक्षिक विभाग प्रमुख प्रकाश सुवेदीको स्वागत मन्तव्य सँगै शुरु भएको अंग्रेजी माध्यममा राखिएको वादविवाद प्रतियोगितामा अङ्कुरम् एकेडेमीकी छात्रा समृद्धि क्षेत्री प्रथम, नारायणी पब्लिककी छात्रा सौरभी हमाल द्वितीय र ग्रीनल्याण्ड पब्लिककी छात्रा विदुसी कार्कीले तृतीय स्थान हासिल गरेका थिए ।

कार्यक्रममा प्याब्सन चितवनका अध्यक्ष कीर्तिनिधि अर्याल, इन्द्रेश शाह, वाल्मीकिका सहायक प्राचार्य दुर्गाप्रसाद घिमिरेलगायतले मन्तव्य राख्दै कार्यक्रमबारे प्रकाश पारेका थिए भने विजेता तीन जनालाई बेसका अध्यक्ष इन्द्रेश शाह, उपाध्यक्ष शिवु केसी र वाल्मीकि शिक्षा सदनका सहायक प्राचार्य दुर्गाप्रसाद घिमिरेले मेडल, शील्डलगायत पुरस्कार वितरण गरेका थिए ।

भरतपुर, ९ मंसिर ।
सनराइज स्कुलको ३५औँ वार्षिकोत्सवका अवसरमा १८औँ जिल्लाव्यापी विद्यालयस्तरीय कविता प्रतियोगिता गरिएको छ ।

प्रतियोगितामा अङ्कुरम् एकेडेमी कृष्णपुरका सोहम अधिकारीले प्रथम स्थान हासिल गरेका छन् । अधिकारीले `माटोको माया´ शीर्षकको कवितालाई प्रतियोगितामा वाचन गरेका थिए । त्यसैगरी पोलर स्टार स्कुल गौरीगञ्जका आँचल देवकोटा द्वितीय, स्काइराइडर स्कुल रत्ननगरका यश्मन पोखरेल तृतीय तथा सान्त्वना पुरस्कार स्मल हेभन मोडल स्कुल आँपटारीका अभिनव अधिकारी र लक्ष्मी मावि लंकूका कुसुम सापकोटाले प्राप्त गरेका छन् ।

प्रतियोगितामा १७ वटा विद्यालयका ३१ जना विद्यार्थी प्रतियोगीको रूपमा सहभागी थिए । कार्यक्रमका प्रमुख अतिथि धनराज गिरिले विद्यालयमा गरिने यी खाले प्रतियोगिताले विद्यार्थीमा सिर्जनात्मक विकास हुने बताए । प्रतियोगिताको निर्णायकमा प्राध्यापक कपिल अज्ञात, रमेश प्रभात र रामजी भट्टराई रहेका थिए ।

चितवन – अङ्कुरम् स्काउट ट्रुपको आयोजना तथा अङ्कुरम् एकेडेमी चितवनको सहयोगमा अन्तरविद्यालय स्काउट रनिङ्ग शिल्ड नृत्य प्रतियोगिता सम्पन्न भएको छ । प्रतियोगितामा सनराइन इग्लिस स्कुल प्रथम , ग्रिनल्याण्ड इङ्गिलस स्कूल द्धितिय र एकता शिशु निकेतनका विद्यार्थीहरुले तृतीय स्थान हासिल गरे । प्रथम हुने समुहले १० हजार नगद सहित रनिङ्ग शिल्ड प्राप्त गर्यो भने द्धीतिय हुनेले ७५सय र तृतीय हुनेले नगद ५हजार पुरस्कार राशी प्राप्त गरे । प्रतियोगितामा मुग्लिगं देखि माडी सम्मका २० वटा विद्यालयका करिब १४० विद्यार्थीहरुको सहभागी रहेको थियो ।

हरितालिका तिजको अवसर पारेर नेपाली कला र संस्कृतिको संरक्षण संगै विभिन्न विद्यालयको स्काउट विद्यार्थीहरुको मित्रता कायम गर्ने उद्धेश्यले कार्यक्रम गरिएको एकेडेमीका परीक्षा प्रमुख सदिक्षा पौडेलले जानकारी दिनुभयो । प्रतियोगितामा बज्रयोगा तथा डान्स एकेडेमीका निर्देशक पुष्प श्रेष्ठ र अङ्कुरम् एकेडेमीका नृत्य प्रशिक्षक निरा गुरुङ्गले निर्णायकको भुमिका निभाउनु भएको थियो ।

पठनपाठन साथसाथै अतिरिक्त कृयाकलापलाई पनि अन्तर्राष्ट्रिय स्तरबाट संचालन गर्दै आइरहेको यस एकेडेमीले मासिक तथा वार्षिक रुपमा विभिन्न कार्यक्रमहरु संचालन गर्दै आइरहेको छ ।अङ्कुरम् एकेमीका स्तर प्रमुख अर्जुन जि शर्माले सञ्चालन गर्नुभएको सो कार्यक्रमको प्रमुख अतिथि भरतपुर महानगरपालिका वडा नम्बर १० का वडाध्यक्ष एवं सामाजिक समन्वय समितीका संयोजक परमेश्वर खनाल रहनुभएको थियो । कार्यक्रममा प्याब्सन केन्द्रिय समितिका सदस्य मोहन लामा, स्काउट रोवर लिडर तथा स्काउटर सि.ए.एल.टि शिव प्रसाद बराल , एकेडेमीका कार्यकारी निर्देशक नवराज पौडेल लगायतको सहभागिता रहेको थियो ।